شكاك اوي بدرجة غبية بسبب صراحتي معاه

السلام عليكم ورحمة الله وبركاته

أنا عرفته من حوالي 6 سنين هو أكبر مني وعرفته عن طريق مشاركتي في فريق مسرحي حاول يتعرف عليا بس أنا كنت صارمة أوي في الموضوع ورافضة تمامآ وعدى تلات سنين علي نفس الموضوع لحد ماتكلمت معاه وحسيت إنه بيحبني بجد ومش عايز غير إنه يفضل جنبي حتى لو مش بحبه قربنا شويه من بعض وأنا بصراحة ماكنتش مصدقة إن في حد بيحبني انا الحب ده كله فضلت أقاوح لنفسي سنة وإللي بنا كان سؤال ولو مثلآ مقابلة جماعية في شلة المسرحية القديمة لحد ما فجأة حسيت إني بلجأله في كل مشاكلي حسيت بخوفه عليا وحبه ليا وبعد مرور أربع سنين تقريبآ لقيت نفسي بحبه أوي وإرتبطنا وكان شيلني من الأرض شيل وكنت انا رقم واحد في كل الدنيا وبصراحة كنت بتدلع براحتي وحاسه بقيمة نفسي أوي وإتعرف علي أخواتي وإتقدملي وإتخطبنا وكتبت كتابي من سنتين (ودخلت من ورا أهلي) بس انا متزوجة مكتوب كتابي بس أنا لسه في بيت أهلى ..

كنت ديمآ صريحة معاه في كل كبيرة وصغيرة وماكنتش بسمع كلام لحد لما يقولي مادمتي مش بتعملي حاجة غلط وبتتقي الله ربنا حيباركلك بس علشان هو كده ماتفتحيش علي نفسك بقا علشان يعني هو شكاك ومش بيصدقني وفكرته حيحترم صراحتي زي مانا باجي علي نفسي أوي لما بيبقا صريح بس علشان يفضل صريح مش يخاف من رد فعلي أو من المشاكل وببقا في حيرة إني أهد الدنيا ولا أسامحه وأصبر علشان يبقا صريح معايا وكفاية إن هوإللي بيجي يقول ..

من كتر ماكنت صريحة معاه مش مكفيه وديمآ فاكر إن فيه أسرار وحاجات أكبر أنا مخبياها رغم إنه لما عرفني كان عندي 17 سنة يعني نونو خالص أنا دلوقتي 23 سنة ويدمآ بيحفر في الماضي وبيكدبني حتى لما ببقا صريحة ..

مابقاش بيصدقني في حاجة رغم إني مش عارفه أبطل أبقا صريحة أنا صريحة لدرجة إني بقوله دخلت الحمام كام مرة ف اليوم !!

يكدبني وأثبتله إن عن طريق أمي أو أخواتي بيكدبني لحد ماوريله بعنيه مثلآ لو نزلت مع أمي أصورها معايا من علشان أثبتله لو نازلة بالعباية بتاعه الصلاة حشتري حاجه من تحت البيت بيكدبني كأني كنت خارجه ولابسه وبتاع بصورله نفسي وأوريله الصورة علشان يصدق أبقا بكلمه تليفون حد ف البيت يرن يفكره ليا أتخانق معاه وأقوله أنت مالك لا يخصني ولا يخصك..

بيشك فيا مع إني والله ماعملتش حاجه غلط وبحبه بدرجة هيستيريه ومش طبيعية ومش شايفه أي رجالة ف الدنيا غيره..

بس في مرة واحد حب يرتبط بيا ويجي يتقدملي وانا روحت حكتله كل حاجه وماكنش يعرف الشخص ده إنه مكتوب كتابي ووصل لرقمي وحاول يكلمني وانا ساعتها قولت انا حتصرف من غير مشاكل انا مش عيلة صغيرة وحلغي كل الكلام الفارغ ده بس بعد كده كدبني علشان ماقولتش من الاول !!

وبعد كل المشاكل دي بيجي يتأسف ويقولي أنتي ست البنات ويبوس إيدي ورجلي (لما بنبقا لوحدنا) ويصالحني ويرجع من تاني ويقولي أنا زي الفل ومحدش يقدر يقول غير كده وإنه مالوش غيري وساعات بعدها ف التليفون يتأسف بس انا بقا ببقا شايلة منه إللي قاله والشتيمة والإهانة وجرح الكرامة والشك فيا..

بحبه أوي وهو كمان بيحبني اوي لدرجة إنه عايز يحطني جوة جيبه وأنا ماشيه ف الشارع أو يلبسني ملاية سرير وانا خارجه !!

بس أنا مش قادرة أعيش مع شخصيتين واحد بيحبني أوي ويخاف عليا وواحد تاني لما بس بيحس بالغيرة بيحسسني بشكه فيا وعدم ثقته ويرجع يقول إنه بيثق فيا ..

تعبانه مش قادرة أستحمل بحبك وماقدرش أعيش من غيرك وأنتي كدابة ومخبية عليا وإهانات في كرامتي في أقل وأتفه الحاجات إللي تخصني وإللي ماتخصنيش ..

ومحدش يقولي خدي موقف علشان طبعا ورانا مصالح مشتركة ولازم ابقا موجوده علشان مافيش حاجه تتأجل او تبوظ وعلشان الشغل.. وعلي فكرة لما باخد موقف وماكلموش بيفكرني خرجت اتفسحت من وراه ويقول اني عملتها كذا مرة وهي ماحصلتش ويقولني حاجات ويخترع حاجات يفضل يهني بيها كأني كدابة وهو إكتشف الموضوع ده اكتر من مرة ..

بحس ساعتها إهانة فيا وفي اخلاقي وغصب عني بحس إنه بيهين رجولته في نظري مش ببقا مصدقة يطلع منه كده علشان هو رجلي وحبيبي واخويا وابويا وابني وصاحبي وصاحبتي كمان..

قولولي اتصرف ازاي اكتر من اني بثبتله عكس كلامه بصور بمكالمة بخلي ماما تدخل او حاجات زي دي اعمل ايه انا بحس بحاجات ويحشة اني بدافع عن نفسي وانا مظلومة ونفسي بتصعب عليا ..

ومحدش يقولي مش بيحبني ده جوزي وبيخاف عليا من الهوا بس مش بيخاف عليا يجرحني ويوجعني ويهني وقت غضبه وغيرته وشكه ..

أسفة طولت عليكم