بسبب الحب الفاشل مبقتش اثق فى راجل

السلام عليكم ورحمة الله وبركاته

انا بنت عندى 19 سنه كتبت قبل كده من شهر مشكلتى فى انى كنت بحب واحد وابتدت مشاكلنا لما عرفت انه لسه بيكلم حبيبته القديمه وكان بيقنعنى انهم اصحاب مش اكتر مع علم انه كان مكلم اهلى وكان ارتباطنا هيبقى فى الصيف ومع انى ظهرتلكم قد ايه هو بيحبنى وانا بحبه الا ان بصراحه الاغلبيه كان رأيهم انى اسيبه لانه لسه بيحبها ومنسهاش وانى بلاش اعلق نفسى بيه اكتر من كده…….وطبعا لأنى بحبه سديت ودنى واقنعت نفسى بانه بيحبنى وكل افعاله بتدل على كده وكملت……معداش اسبوع تقريبا وكلمت البنت دى صدفه واتكشفت انه اصلا مسبهاش من الاول وانهم لسه مرتابطين وكانت بتكلمنى بتحكيلى مشكله بينهم وانه بقى متغير معاها بقالوا كتير وانا نصحتها بانها تستحمل وتصبر لانه عنده مشاكل كتير الفتره دى وكانت فكرانى انا وهو لسه اصحاب واليوم اللى بعده اتصلت بيه سألته عن صحته واحواله كان بيقولى احلى كلام فى الدنيا وانها هانت وانه اول ماينزل القاهره هيقابل ماما ويتفقوا انشالله على قراية فاتحه الاول وفى الصيف انشاءالله الخطوبة وانه خلاص لاقه الشقه وكده يقدر يتقدملى ويكون واثق انه مش هيترفض كنت انا ببكى ومش قادره اقوله على اللى عرفته ولما كان بيسألنى بتبكى ليه كنت بقوله ابدا بحبك وواحشتنى بس واليوم اللى بعده سألته اذا كان لسه بيكلم حبيبته القديمه ولا لأ حلفلى انه بقالوا فتره كبيره مابيكلمهاش مستحملتش كديه ولاقيت نفسى غصب عنى بتعصب وبنهار عياط وقلتله كلام جامد ولعنت اليوم اللى عرفته فيه وانى كرهت نفسى بسببه وانى بدعى ربنا انى اكره عشان ابعد عنه,وطبعا هو اتصدم ماكنش يتخيل انى اقول كلام زى ده وزعل جدا وماكنش يعرف ايه السبب الحقيقى انى عملت كده بقيت احاول ارضيه واصلحه لانى جرحت كرامته وبستحمل طريقته وبرودة كلامه وكأنى انا الغلطانه قالى انه سامحنى بس لسه مش قادر ينسى كلامى ليه وانى اسيبه يهدى فترة امتحانتنا دى وفى الفتره دى يكون كلامنا عادى وبعد الامتحانات نتحاسب وصدفه لاقيت نفس البنت بتكلمنى وبتسألنى اذا كنت انا وهو مرتبطين ولا لأ ولما سألتها بتسأل ليه قالتلى انها شافت رسايلى ليه ورسايله ليه على اميله وانها مبدولش على اصحاب خالص قفلت معاها ومتكلمتش وقررت انى افاتحه باللى سمعته لانى فى الاول عشان ظروفه والمشاكل اللى هو فيها ماكنتش عايزه اقوله حاجه ,وتانى يوم كلمته لاقيته بيكلمنى بطريقه بارده اوى سألته انت لسه مرتبط بيها؟ قالى……….اه,انتى عارفه هى بالنسبه لى ايه سألته وانا؟كنت بالنسيه ليك ايه؟ قالى…….كنتى زى ماكنتى اه بالظبط بالنص والحرف قالى الجملتين دول وقفل انهارت لمدة يومين كنت ساكته حتى الدموع ماكنتش قادره تنزل من الصدمه وتعبت ودخلت المستشفى بسبب كل ده وبعد ما طلعت كنت بحاول ارمى كل ده ورا ضهرى عشان كان ورايا امتحانات وقلت انه مش هينفعنى لو سقطت بعدها بكام يوم كلمنى وفهمنى انه عمل كده لان مامته ماوفقتش عليا واتحجج بموضوع البنت دى عشان اكره وابعد بس هو مقدرش يبعد وانا حاطه الصوره دى عنه فى خيالى وطبعا مصدقتوش وقفلنا على انه عاوزنا نبقى اصحاب وانا رفضت……بعدها بيومين كان بيكلمنى بيبكى عشان خالته..مامته فى الرضاعه…ماتت وقفت جنبه وكنت بواسيه وقلت انا هبقى جنبه فترة الامتحانات دى وبعد كده هبعد تانى كان كل ما بنتكلم كان بيسألنى انتى بتعملى كده ليه او انى كتير عليه وانتى بنت ناس وماتستهليش واحد زى وانا كان ردى بيبقى:عارفه كنت بأنب نفسى ان ازاى بعد كل اللى عمله فيا بكلمه وبواسيه وواقفه جنبه ومهتمه بيه,طب وانا مين يقف جنبى ؟ ليه دايما هو رقم 1 فى لستة حياتى وانا اخر حاجه فى لستتوه ولستتى كمان,ليه دايما اقول انا مش قادره ابعد او خلينى معاه كده والزمن هينسنى…طب وليه اسيب الزمن يتحكم فيا ليه مانسهوش انا؟ بعدها قررت ادوس على قلبى ولأول مره ومكلمتوش ولما بيكلمنى بطلت اضعف وارد وردبت عليه مره ولما سألنى ليه بعدتى قلتله مش هقدر اكون كده ولا هينفع انا وانت نتكلم تانى وطالما انا وانت عمرنا ماهنكون ليعض فمينفعش نتكلم تانى وبطلت اكلمه ولما بيتصل مابردش لحد ما بطل يتصل وانا بطلت اسأل المشكله انى اوقات بحن ليه مش قادره اتعودت انى بقيت لوحدى خلاص كنت متعوده انه على طول معايا…انا عارفه انه هو دلوفتى انا ولا فارقه معاه وزى ماروحت بالنسبه له يجى غيرى واكتر حاجه بتدايقنى انى فاكره كل كلامه ووعوده واوقات بحط اللوم عليا فأن سبب البعد انى كلمته بطريقه وحشه اوى وانى كررت كلمى نسيب بعض اكتر من مره واكيد زهق…………بس برضه ارجع واقول انى كنت مولعه صوابعى العشره شمع عشانه وانى حتى لما كنت بقول كده كان بيبقى غصب عنى ولانه بيعمل مواقف لا تحتمل وان الحاجات الحلوه اللى عملتهاله اكتر بكتير من الوحشه يبقى ليه يعمل فيا كده,انا خلصت امتحاناتى على خير بس هو مش قادره انسى واوقات كتيره بضعف وبحاول اكلمه بس على اخر لحظه بقوى تانى…..انا تعبت ومابقتش اثق فى حد لانه مش اول حب ولا جرح وفى واحد كان عايزنى من زمان ودلوقتى اتخرج وعايز يتقدملى بس المشكله انه كشكل مش مقبول يعنى تحت خط القبول ولما قلت لنفسى المهم قلبه وانه يبقى حنين وطيب معاكى حصلت مشكله حسيت فيها انه عنده حتة لا مبالاه قلت يبقى بلاش اخش فى مواضيع فاشله تانى ورفضت عرسان غيره وعلاقات حب تانيه المشكله انى بطلت اثق فى حد وبقى فى نظرى كل الرجاله كدابين وملهومش امان ولانى من صغرى فى مشاكل كتير اوى بقيت مش عايزه ازود على مشاكلى اكتر كفايه اللى كنت فاكراه هيهون عليا وهيبقى احن حد عليا فى الدنيا دى غدر بيا….هو انا ايه مش بحرم؟ انا حاسه انى اتعقدت علما بان ابويا كمان مربيلى العقده دى من صغرى….من كتر ما انا تعبانه فكرت جديا انى اروح لدكتور نفسانى

بس قلت اعرض مشكلتى عليكم الاول جايز الاقى الحل ليها

اسفه لو طولت عليكم


1
Share
مشاكل وحلول ذات صلة