الابن الشهيد

الابن قام مفزوع من نومه مش رايق على شعبه دا الغلبان زعلان ومتضايق

مسك القلم ف أيديه وقال للنظام امشي بس القلم من الخوف خانه وما كتبشي

كتبها من دمه وهو يا ناس مجروح وكبر وراح قايل يا روح ما بعدك روح

وصلى وقال لأمه على الميدان هيروح صعبان عليه ينسى شعبه اللي عاش مدبوح

نادت عليه أمه وقالت له يأبني اسمع خايفه عليك يا ضناي اخذي الشيطان وارجع

لكنه واد راجل مليان يا ناس إصرار حالف لشعبه يعيش ويكون من الاحرار

ودع يا ناس أمه وخدها في أحضانه وسابها عشان يحمي شعبه وأوطانه

وأمه يا ناس قاعدة من قلبها بتبكي وبتدعي ليه ربه وبدمعها بتشكي

مهنش عليه يسيبها غرقانه في دموعها ولا هان تكون بلده مطفية في شموعها

راح الميدان هناك ومفيش فأيده سلاح أوعوا تقولوا يا ناس عالأبن دا سفاح

رمل بلده بيتسرق وأرضه قاعدة بتنحرق وشعبه عمال يفترق وضميره مش مرتاح

رايح يوقف وحش نهش في ألوف مساكين حالف لياخد التار ويحارب الملاعين

وصل الميدان وقال وينك يا حرية ؟؟ ما كفاية عشنا سنين في حكومة جبرية

وجمع وراه ملايين ستات ورجالة قالوا للنظام عايزين حرية وعدالة

وقالوا للرئيس امشي وكفاية 30 سنة شوفنا الفساد والظلم ولا دوقنا طعم الهنا

وقالوا بعلو الصوت سلمية سلمية عايزين بلدنا تكون من الظلم محمية

وقالوا الكرامة وين كلمتنا مسموعة عايز اعيش لي يومين وانا راسي مرفوعة

كانت مطالبهم في الثورة شرعية عايزين كرامة وعدل ومعاها حرية

شوفوا الولد ازاي جمع وراه ملايين ؟ قائد يا ناس وشجاع وتقول صلاح الدين

والشرطة جت تضرب مطاط يا ناس ومسيل وصاحبنا دا مصمم لازم يكون في رحيل

ضربت رصاصها الحي قالت عليه دا عميل وقع الولد عالأرض والدم منه يسيل

ضحى عشان غيره وضربوه يا ناس بالنار من غيرته على بلده الموت بأيده اختار

كانت نهايته الموت مع انه كان عارف كافح بكل صمود وبقلب مش خايف

كان حلمه غيره يعيش مسألش في حياته شرب الوطن من دمه وقطر الحياة فاته

شوفوا يا ناس ازاي الابن دا كمل مع ان غيره جبان ما قدرش يتحمل

نطق الشهادة وقال للمولى أنا رايح والدم منه يا ناس عالأرض كان سايح

وأمه يا ناس في البيت قلقانه وحزينة اصله ابنها الوحداني ورداية في جنينه

قاعدة ترن عليه عايزه تقوله ارجع لكن ضناها يا ناس مبقاش خلاص يسمع

والله يا أمي الدم دا ما يروح لو تمنه كان دمي لازم أضحي وأروح

سـيبي الشهيد يرتاح وأنا أكمل المشوار من يوم ما شوفت الظلم وأنا قلبي قـايد نار

وأمانه يا أمي بلاش أشوف دمعك قلبي بيتقطع وابنك هناك سامعك

دمعك على قلبي سكينة وبتجرح أم الشهيد الحر لازم تقوم تفرح

ما ابنك أنا بردو . ولا أني مش ابنك ؟؟؟ وحضن أمي كمان هو أكيد حضنك

لو غالي أنا عندك وراضيه أكون ابنك وريني ضحكاتك وبلاش أشوف حزنك

ما تقولي يا مبارك حرقت قلبها ليه ؟؟؟؟؟ ما كفاية شافت مر وأنت عامل فيها بيه

علشان تعيش شهرين قتلت أبن برئ صدقني لاخد تاره وبقلب والله جرئ

سهرت ليالي كتير علشان تربي فيه دلوقتي سهرانة قاعدة بتبكي عليه

أمنك دا كان دوره يسهر ويحمينا دلوقتي ليش اختار يقتل اهالينا ؟؟؟؟

ما أنت اللي قايـله أضرب ولا يهمك أومال هتعمل إيه لو دمه مش دمك ؟؟؟

انسي خلاص يا مبارك إن أنت تحبسنا راحت ليالي الظلم ورجعت خلاص روحنا

مات الشهيد علشان ترجع كرامة الشعب والله دمه يا ناس غالي وجوا القلب

هفضل أنا وابني فاكرينه طول العمر وف شعري هحكي عليه لولاد بلادي السمر